အကြမ်းစစ်တပ်က ပြည်သူတွေနေအိမ်ကို မီးရှို့ဖျက်ဆီးမှုမှာ နောက်ဆုံးနှစ်လ အတွင်းမီးရှို့မှုက ပိုများနေ

အကြမ်းစစ်တပ်က ပြည်သူတွေနေအိမ်ကို မီးရှို့ဖျက်ဆီးမှုမှာ နောက်ဆုံးနှစ်လ အတွင်းမီးရှို့မှုက ပိုများနေ
မတ် ၃ ၊ ၂၀၂၂

မင်းအောင်လှိုင်ခေါင်းဆောင်တဲ့ အကြမ်းဖက်စစ်ကောင်စီတပ်အာဏာသိမ်းပြီးနောက်ပိုင်း ဒေသအသီးသီးက ပြည်သူလူထုနေအိမ်တွေကို အကြမ်းဖက်တိုက်ခိုက်မီးရှို့မှုတွေလုပ်ဆောင်ခဲ့ရာမှာ စုစုပေါင်း လူနေအိမ် ၆၀၀၀ ကျော်ပျက်စီးခဲ့ရပြီဖြစ်ပါတယ်။

စစ်ကောင်စီတပ်နဲ့ လက်အောက်ခံအဖွဲ့အစည်းတွေက မီးရှို့လို့လက်ရှိအချိန်မှာ လူနေအိမ် ၆၁၅၈ လုံး ပျက်စီးခဲ့တယ်လို့ Data For Myanmar က မတ်လ ၂ရက်မှာထုတ်ပြန်ပါတယ်။ အဲဒီအရေအတွက်ဟာ နေရာပေါင်း ၁၆၅ နေရာ မှာဖြစ်ပွားခဲ့တာလို့ဆိုပါတယ်။

Data For Myanmar က ပြုစုထားတဲ့ စာရင်းတွေ အရ စစ်ကောင်စီတပ်တွေကိုခုခံတိုက်ခိုက်မှုတွေအားကောင်းတဲ့ စစ်ကိုင်းတိုင်းက ကျေးရွာတွေအများဆုံး မီးရှို့ခံခဲ့ကြရတာဖြစ်ပါတယ်။

အကြမ်းဖက်စစ်ကောင်စီတပ်ကရွာလုံးကျွတ်မီးရှို့တာအပါအဝင် နေအိမ်တွေကိုမီးရှို့ဖျက်ဆီးမှုအကြိမ်ကြိမ် လုပ်ဆောင်ခဲ့လို့ စစ်ကိုင်းတိုင်းမှာ အိမ် ခြေ ၃၆၀၀ ကျော်ပျက်စီးခဲ့ရတယ်လို့ဆိုပါတယ်။

ချင်းပြည်နယ်မှာ အိမ်ခြေ ၁၁၀၀ ကျော်၊မကွေးတိုင်းမှာ အိမ်ခြေ ၉၀၀ခန့်၊ ကယား(ကရင်နီ)ပြည်နယ်မှာ အိမ်ခြေ ၃၀၀ ကျော် စစ်ကောင်စီလက်ချက်ကြောင့် ပျက်စီးခဲ့ရပြီး ရှမ်းတောင်၊မန္တလေး၊တနင်္သာရီ၊ပဲခူးနဲ့ ကရင် ဒေသတွေမှာလည်းစစ်ကောင်စီတပ်တွေရဲ့မီးရှို့မှုတွေကြောင့် ပြည်သူလူထုနေအိမ်တွေ ပျက်စီးခဲ့ရပါတယ်။

စစ်ကောင်စီတပ် မီးရှို့ဖျက်ဆီးခဲ့သည့်နေအိမ် ၆၀၀၀ ကျော်ရှိတဲ့အနက် နေအိမ် ၃၀၀၀ ကျော်ဟာ အခု ၂၀၂၂ ဇန်နဝါရီနဲ့ ဖေဖော်ဝါရီလအတွင်း ပျက်စီးခဲ့တာကို Data For Myanmar ရဲ့ စာရင်းတွေမှာတွေ့ရပါတယ်။

ဒါ့ကြောင့် စစ်ကောင်စီတပ်သည် ယခုနောက်ပိုင်း အရပ်သားပြည်သူလူထုတွေနဲ့ပြည်သူလူထုတွေရဲ့ ကျေးရွာတွေကို ပစ်မှတ်ထားတိုက်ခိုက်မှုတွေ တိုး၍လုပ်ဆောင်လာတာကိုလည်းတွေ့ရမှာဖြစ်ပါတယ်။ အကြမ်းဖက်စစ်ကောင်စီတပ်အနေနဲ့ ပြည်သူလူထုတွေရဲ့နေအိမ်တွေကိုတမင်မီးရှို့တာ၊ရည်ရွယ်ချက်ရှိရှိ လက်နက်ကြီးတွေနဲ့ပစ်ခတ်တိုက်ခိုက်တာ၊လေကြောင်းကနေဗုံးကြဲတိုက်ခိုက်တာစတဲ့ပုံစံမျိုးစုံနဲ့အကြမ်းဖက်နေတာ ဖြစ်ပါတယ်။
#SpringReovlution
#PVTV
#PVTVNews
#PVTV ရဲ့ သတင်းများကို Telegram Channel – https://t.me/pvtvmyanmar ကို subscribe လုပ်ထားခြင်းအားဖြင့် ဖတ်ရှုနိုင်ပြီဖြစ်ပါတယ်။



Public Voice is Public Power.

PVTV will broadcast the activities of Committee Representing Pyidaungsu Hluttaw, National Unity Consultative Council and National Unity Government and other artworks which reflect the spirit of Spring Revolution.