ဒီဇင်ဘာ (၁၀) ရက်နေ့ အပြည်ပြည်ဆိုင်ရာလူ့အခွင့်အရေးနေ့ အထိမ်းအမှတ် NUG အစိုးရ ထုတ်ပြန်ကြေညာချက်

ဒီဇင်ဘာ (၁၀) ရက်နေ့ အပြည်ပြည်ဆိုင်ရာလူ့အခွင့်အရေးနေ့ အထိမ်းအမှတ် NUG အစိုးရ ထုတ်ပြန်ကြေညာချက်

ဒီဇင်ဘာ ၁၀၊ ၂၀၂၁

၁။ အပြည်ပြည်ဆိုင်ရာလူ့အခွင့်အရေးကြေညာစာတမ်းကို ကုလသမဂ္ဂအထွေထွေညီလာခံ ၁၉၄၈ ခုနှစ် ဒီဇင်ဘာလ (၁၀) ရက်မှာအပြည်ပြည်ဆိုင်ရာ လူ့အခွင့်အရေးနေ့အဖြစ် သတ်မှတ်ပြီး တစ်ကမ္ဘာလုံးမှာ နှစ်စဉ်ကျင်းပခဲ့ကြတာဖြစ်ပါတယ်။
မြန်မာနိုင်ငံကလဲ အပြည်ပြည်ဆိုင်ရာလူ့အခွင့်အရေးကြေညာစာတမ်းကို အတည်ပြုဖို့ ထောက်ခံဆန္ဒမဲပေးခဲ့တဲ့ နိုင်ငံပေါင်း (၄၈) နိုင်ငံမှာ တစ်နိုင်ငံဖြစ်ခဲ့ပြီး လူ့အခွင့်အရေးကို လေးစားကြောင်း ပြသခဲ့ပါတယ်။ ဒီလိုထောက်ခံခဲ့တာ နှစ်ပေါင်း (၇၃) နှစ်ရှိပြီဖြစ်ပေမယ့် မြန်မာပြည်သူထုက လူ့အခွင့်ရေးနဲ့ လူ့ဂုဏ်သိက္ခာအတွက် မျက်ကွယ်ပြုခံနေရပြီး အကြမ်းဖက်စစ်အုပ်စုက အာဏာသိမ်းဖို့ ကြိုးစားတာကို ရင်ဆိုင်နေရတာအပြင် အချိုးဖောက်ခံနေရတဲ့ အခြေခံ လူ့အခွင့်ရေးအတွက်လဲ ခုခံတိုက်ပွဲဝင်နေကြရတာဖြစ်ပါတယ်။

၂။ ၂၀၂၁ ခုနှစ် အပြည်ပြည်ဆိုင်ရာ လူ့အခွင့်အရေးနေ့အတွက် ကမ္ဘာလုံးဆိုင်ရာဆောင်ပုဒ်က “တန်းတူညီမျှခြင်း – မညီမျှမှုများကို လျော့ချလို့ လူ့အခွင့်အရေးကို မြှင့်တင်စို့” ဆောင်ပုဒ်ဖြစ်ပါတယ်။
တန်းတူညီမျှခြင်းနဲ့ လူ့အခွင့်အရေး အတွက် စဉ်ဆက်မပြတ် တိုက်ပွဲဝင်ကြရမျာက လူသားမျိုးနွယ်တစ်ရပ်လုံးရဲ့ တာဝန်ဖြစ်ပါတယ်။ မြန်မာနိုင်ငံက လူမျိုးစုအလိုက်၊ လူတန်းစား အလွှာအလိုက်၊ လူအုပ်စုအလိုက် တန်းတူညီမျှကင်းမဲ့တဲ့ အတိတ်ဆယ်စုနှစ်များစွာကို ဖြတ်သန်းခဲ့ကြရပြီးဖြစ်ပါတယ်။၂၀၂၁ နွေဦးတော်လှန်ရေးက မြန်မာနိုင်ငံ သမိုင်းတလျောက်မှာ တည်ရှိခဲ့တဲ့ မမျှတမှုတွေကို အပြီးတိုင်ဖြေရှင်းကျော်လွှားပြီး ပြည်သူအားလုံးရဲ့ လူ့အခွင့်အရေးနဲ့ လူ့ဂုဏ်သိက္ခာကို အာမခံနိုင်မယ့် လွတ်လပ်ခြင်း၊ တန်းတူညီမျှခြင်းနဲ့ အတူ တရားမျှတခြင်းပြည့်ဝတဲ့ ဖယ်ဒရယ်ဒီမိုကရေစီနိုင်ငံသစ်ကို တည်ဆောက်နိုင်ဖို့ မျှော်လင့်တဲ့ တော်လှန်ရေးဖြစ်ပါတယ်။

၃။ ဒီလို ဖယ်ဒရယ်ဒီမိုကရေစီနိုင်ငံသစ်ကို ထူထောင်နိုင်ဖို့အတွက် အရေးအကြီးဆုံး အချက်က နိုင်ငံတကာ ရာဇဝတ်မှုနဲ့ အကြမ်းဖက်လုပ်ရပ်တွေကို စနစ်တကျ ကျယ်ကျယ်ပြန့်ပြန့် ကျူးလွန်နေတဲ့ အကြမ်းဖက် စစ်အုပ်စုကို ဖယ်ရှားနိုင်ဖို့ဖြစ်ပါတယ်။ မြန်မာ ပြည်သူတွေကလဲ အကြမ်းဖက်စစ်အုပ်စုကို နည်းလမ်းပေါင်းစုံနဲ့ ဆန့်ကျင်နေတာဖြစ်ပြီး အမျိုးသားညီညွတ်ရေးအစိုးရအနေနဲ့ အလွန်လေးစား ဂုဏ်ယူမိကြောင်း ပြောကြားလိုပါတယ်။ အခုနှစ် ကျရောက်တဲ့ တော်လှန်သောလူ့အခွင့်အရေးနေ့မှာ မြန်မာနိုင်ငံ လူ့အခွင့်အရေးအတွက် နည်းပေါင်းစုံက တိုက်ပွဲဝင်နေကြတဲ့ တက်ကြွလှုပ်ရှားသူတွေရဲ့ ကြွေးကြော်သံ “ဆိတ်သုဉ်းနေတဲ့ လူ့အခွင့်အရေး၊ တော်လှန်ရေးနဲ့ သိမ်းပိုက်ကြ” ဆိုတဲ့အတိုင်း မတရားလုယူခံနေရတဲ့ လူ့အခွင့်အရေးတွေကို တော်လှန်ရေးအသွင်အမျိုးမျိုးဆင်နွဲပြီး ပြန်လည်အရယူရန် လိုအပ်လာပြီဖြစ်ပါတယ်။

၄။ ပြည်သူလူထု ရဲရင့်တဲ့တိုက်ပွဲဝင်မှုတွေနဲ့အတူ အပြစ်မဲ့ပြည်သူတွေအပေါ်ကျူးလွန်ခဲ့တဲ့ အကြမ်းဖက် စစ်အုပ်စုရဲ့ဆိုးရွားလှတဲ့ လူ့အခွင့်အရေးချိုးဖောက်မှု နိုင်ငံတကာရာဇဝတ်မှု ကျူးလွန်မှုတွေနဲ့ ပတ်သက်ပြီး တရားမျှတမှုကိုဖော်ဆောင်နိုင်ဖို့ မိမိတို့ အမျိုးသားညီညွတ်ရေး အစိုးရက အပတ်တကုတ်ကြိုးပမ်း သွားပါမယ်။ဒီလို အကျည်းတန်တဲ့ဖြစ်ရပ်ဆိုးတွေကို နောက်နောင်မဖြစ်ပေါ်စေရေး အတွက်လဲ ဦးတည်လုပ်‌ဆောင်သွားမယ်လို့ ကတိပြုအပ်ပါတယ်။

၅။ ဒီနေ့ နေ့ထူးနေ့မြတ်မှာ စစ်အာဏာရှင်စနစ်ကို တွန်းလှန်ဆန့်ကျင်နေကြတဲ့ မြန်မာပြည်သူများ၏ လူ့အခွင့်အရေးအပေါ် တန်ဖိုးထားမှု၊ မိမိနဲ့ အခြားသူတွေရဲ့ လူ့အခွင့်အရေး မဆုံးရှုံးစေရေးအတွက် အဆုံးအထိ ခုခံတွန်းလှန်နေမှုများတွေကို အလေးအနက် မှတ်တမ်းတင်လိုပါတယ်။ မိမိတို့အနေနဲ့ လူ့သမိုင်းမှာ ဆိုးရွားလှတဲ့ အကြမ်းဖက်စစ်အာဏာရှင်စနစ်နဲ့ ရင်ဆိုင်ခဲ့ကြရ၊ ရင်ဆိုင်နေကြရသော်လဲ လူ့အခွင့်အရေး မြတ်နိုးတန်ဖိုးထားမှုတွေကို လျှော့ကျသွားတာမျိုးမရှိပဲ ဖော်ပြနေတဲ့ပြယုဂ်တခုဖြစ်ပါတယ်။ပြည်သူတွေ လွတ်လပ်ခြင်း၊ တန်းတူညီမျှခြင်းနဲ့ တရားမျှတခြင်းတို့ကို ခံစားခွင့်ရဖို့ ထိုက်တန်တာထက်ပိုပြီး ထိုက်တန်လှပါတယ်။။ အမျိုးသားညီညွတ်ရေးအစိုးရအနေနဲ့ မိမိတို့ရဲ့ တော်လှန်ရေး တာဝန်များကို ဦးလည်မသုန် ထမ်းရွက်ပြီး ထိုတန်ဖိုးနှုန်းစံတွေကို အာမခံနိုင်တဲ့ နိုင်ငံတော်တစ်ရပ်ကို တည်ထောင်ဖို့ ကြိုးပမ်းသွားမယ်လို့ ထပ်မံသန္နိဌာန် ပြုပါတယ်။

#SpringRevolution
#PVTV
#PVTVNews



Public Voice is Public Power.

PVTV will broadcast the activities of Committee Representing Pyidaungsu Hluttaw, National Unity Consultative Council and National Unity Government and other artworks which reflect the spirit of Spring Revolution.